البيت - Home

 

ايه اول حاجه بتيجى فى بالك لما بتسمع كلمه " البيت" ؟

بتفكر فى المكان الى انت مقيم فيه دلوقتى؟ولا  لو انت عايش لوحدك هل بتفكر فى بيت أهلك ؟ 

 و أمك و ابوك و أخواتك و خناقه يوم الجمعه؟ ولمتكم على الفطار و المناكفه فى بعض ؟

ولا بيت جدك و جدتك؟ و لمتكم فى الأعياد و لما كنت بتصدق تخلص امتحانات و تاخد اجازه عشان تروحلهم؟

ايه اول حاجه خيالك بيصورها عن كلمه "البيت" ؟ شمس و شيش موارب و ستاره بيحركها هوا خفيف؟  

عفش قديم و صالون مدهب و لون بنى غالب على اثاث الشقه؟ 

ريحه أكل حلوه جايه من المطبخ و ونس و دفى و لمه 

طب مش بتقول دايما وسط الكلام عندنا فى "بيتنا فى مصر" او فى "بيتنا فى البلد" ؟ كان عندنا فى بيت جدى الله يرحمه؟

" بيتنا القديم الى قضيت طفولتى فيه قبل ما نعزل" 

بنقول كلمه " البيت" معرفه بألف و لام على اكتر مكان حاسين براحه فيه و لا اكتر مكان حاسين بانتماء له؟

لما بتحلم انك فى "البيت" بتحلم بأنهى بيت فيهم؟ عقلك الباطن بيختار انهى انه بيتك؟

 :ولا البيت بناسه زى ما قال العظيم وديع الصافى 

يا دار قوليلى يا دار ... راحو فين حبايب الدار ؟ 

لو عندك فرصه تختار بيت واحد بس من الى عيشت فيهم و تكمل فيه حياتك هتختار انهى بيت؟

 هتختار البيت الجديد المودرن الى مليان اجهزه حديثه و ديكورولا هتختار ترجع لبيت جدك القديم بأثاثه البسيط و اضائته الخافته ؟

هل البنى آدم ممكن يحس بالأنتماء لأكتر من بيت؟ 

ولا ممكن البنى آدم ميكونش حاسس الاحساس دا ناحيه اى مكان ثابت؟

ممكن البيت بالنسبالك يبقى بنى آدم؟ هو البنى آدم دا بيتك ؟ ايآ يكن المكان الى انتو فيه سوا هيبقى اسمه "البيت"؟

ولا البيت بالنسبالك المكان الى بتحس فيه انك مرتاح و على طبيعتك تماما من غير ضغوط ؟

زى ما اغنيه Home - passenger بتقول

They say home is where the heart is

but my heart is wild and free

So am I homeless Or just heartless?

  اعتقد مفهوم كل شخص عن البيت قد يختلف و لكن فى النهايه البيت بيعنى لينا اكتر من مجرد 4 حيطان عايشين فيها

بنتعلق بالمكان بذكرياته و ناسه و بنربط كل قطعه جماد فى البيت بالذكريات دى سواء حلوه او وحشه

بنلاقى ناس رافضين يتخلو عن بيت قديم و محتفظين بيه بأثاثه و حاجته كلها و مقفول بقاله سنين عشان فيه ريحه و ذكريات حد بيحبوه و فارق الدنيا

و بتلاقى ناس بتفوت بلاد عشان مش قادرين يعدو من جنب بيت له معاهم ذكريات وحشه

تعلق الانسان بالديار مش حاجه جديده هى منذ قديم الأزل 

و اسمحولى اقتبس من أسم البلوج بيت شعر لقيس ابن الملوح و هو بيقول :

أَمُرُّ عَلى الدِيارِ دِيارِ لَيلى

أُقَبِّلَ ذا الجِدارَ وَذا الجِدارا

وَما حُبُّ الدِيارِ شَغَفنَ قَلبي

وَلَكِن حُبُّ مَن سَكَنَ الدِيارا