عشوائيات
و مودى الملخبط و ساعات بنسبه لأنى برج الجوزاء فبيقولو انهم مزاجيين و كل دقيقه بحال
مع انى مش مؤمنه بالابراج اوى يعنى ولا اعرف اى حاجه عنهم بس جايز بدور على حجه
ببذل مجهود كبير اوى انى احاول افهم نفسى ،، احط ايدى بس على ال pattern
بس معظم الأحوال بفشل و بينتهى بيا الأمر انى ببطل اركز و اتعايش و خلاص
حقيقى مقدرش احدد بشكل واضح ايه الحاجات اللي لو عملتها هبقى مبسوطه لانها بعد شويه بتفقد رونقها و معناها بالنسبالى و الحاجه الى ممكن تخلينى مبسوطه دلوقتى
هى هى ممكن تخلينى متضايقه بكره
أحياناً بشوف الدنيا كلها بمبى و ورود و فراشات و عصافير و سهله و لذيذه رغم ان ممكن يكون بمر بحاجات صعبه جدآ
بس عقلى بيقرر انه فى مود روقان لسبب ما
و احيانا بشوف الدنيا سوده و كئيبه و مش بقدر اقوم من السرير اعمل اى حاجه ،، مش بقدر اواجه العالم مهما حاولت
و مهما كان عندى حاجات مهمه لازم اخلصها
جسمى بيعمل shutdown
وبيقرر انه لحد هنا مش هنقدر نكمل و المود دا ساعات بيستمر ايام
بصراحه ساعات بتحجج انها ممكن تكون هرمونات
بس دى وسيله تانيه عشان اقنع نفسي انها حاجه خارج حدود سيطرتى و ملهاش تفسير منطقى.
ساعات بقرأ حاجات بالصدفه بتنور عندى لمبه كده الى هو آه طب ما ممكن فعلآ اكون اتصرفت كده بسبب كذه
و ساعات لما بلاقى حد بيمر بأحاسيس مشابهه بطمن انى مش لوحدى اهو.
معظم الوقت بحاول مبقاش قاسيه على نفسى و اخدنى على قد عقلى و اسايسنى كده عشان نعدى مع بعض الفتره الرخمه دى.
بس منكرش انى شايفه انى محتاجه افهم اكتر عن نفسى
وعن طريقتى فى التعامل مع المواقف المختلفه
وامتى بيكون رد فعلى عنيف
وامتى بيكون هادى و راسى
ايه الحاجات الى بتأثر فيها و تخلينى مشتته و مشوشه ومش قادره اخد قرار صح
وايه الحاجات اللي بتخلينى عاطفيه زياده عن اللزوم فبرضو باخد قرارات غلط مبنيه على مشاعرى مش عقلى.
بس الأكيد انى لسه فى رحله البحث عن اجابه.....
تعليقات
إرسال تعليق