الونس

الونس...
مش بقدر افكر فى الونس غير و صوت ورده شغال فى الخلفيه و هى بتقول 

بتونس بيك ,, و انت معايا 

بتونس بيك و بلاقى فى قربك دنيايا

لما تقرب ,, أنا بتونس بيك

و أما بتبعد ,, انا بتونس بيك

و خيالك بيكون ويايا 

مش متخيله فكره انى اتونس بشخص لدرجه ان حتى غيابه عنى فى حد ذاته ونس 

طيفه و ذكرياته و كلامه و سيرته ,, فى حد ذاتها ونس 

صوته ونس ,, زى ما صوت ورده الجميل ونس

.............

كلنا بنحب الونس و بنفتقده فى حياتنا

بنشتاق للحظات الى فيها لمة حلوه و ناس حلوه

سفريه 

او لمه صحاب 

او لمه الأهل فى فرح او فى عيد

او فرحه مولود جديد

كلنا بندور على الونس فى حياتنا بشكل او بآخر

و نلعن الوحده و الغربه و البروده

و بنضايق لما بنلاقى ناس حوالينا متونسين و احنا لأ

عندهم ناس تونسهم و احنا لأ

نفس احساس فيروز و هى بتقول : 
صارلى شي ميه سنه مشلوحه بهالدكان

ضجرت منى الحيطان

-----------

الإحساس بالدفى وسط ناس بتحبهم و بيحبوك حتى لو بتعملو حاجات عاديه و متكرره

و حتى لو مش هتعملو حاجه خالص و تعدو ساكتين

حسيت الإحساس دا ناحيه كام شخص؟ انك بتتونس بيه و بوجوده عن كل الناس التانيه

ضحكه من القلب طالعه او فضفضه و عياط 

حكاوى و حواديت 

لمه على اكله حلوه 

او حتى كروزه بالعربيه و انتو مشغلين اغانى و بتغنو معاها بصوت عالى

إحساس الونس وسط ناس ممكن تكون غريبه عنك

 و اول مره تقابلهم بس حسيت انك واحد منهم

وسط ناس بسيطه بس كرمهم و قاعدتهم ونس و دفي 

وسط ازمه او ظروف جمعت بينك و بين ناس فى مكان واحد

طبطبه و كلمه حلوه من حد غريب

قاعده عصارى و دور شاى 

----------

و بصراحه انا ممتنه جدآ لل social Media  انها كانت السبب فى ونس كتير فى حياتى 

فى اوقات كانت تبدو خاليه تمامآ من الونس

رغم مساؤها بس بتخلق نوع مميز من الونس و اللمه يمكن مش موجود او صعب يتوجد فى اى حاجه تانى

اللمه على ماتشات مصر و الونس الى بنحسه ان كل الناس بتتكلم عن نفس الحاجه فى نفس الوقت و بتشارك فرحتها او حزنها 

club house اول ما طلع و لمه الناس و الحكاوى و هما كل واحد فى بلد

ال spaces  بتاعه تويتر 

و اللمه و الرغى فيها و الضحك و الهزار و السف ,, 

يمكن فى ناس كتير بتشغلهم فى الخلفيه عشان بس تحس بالونس

فكره انك حاسس انك قاعد مع ناس و واخد راحتك و بتتكلم بدون هدف ,,

يمكن الهدف الوحيد هو الونس

----

فى ناس بتلاقى الونس فى حيوان أليف ,,, قطه او كلب او حتى بطه

بيتعلقو بيه و يقضو وقت طويل معاه و بيشغلو نفسهم بيه ,, ف بيونسهم

و فى ناس بتلاقى الونس فى حاجه بتحب تعملها ,, الرسم مثلا 

-----

بصراحه بالنسبالى البلوج و البودكاست دا كان احد وسائل البحث عن ونس :)