الحب... لغز ؟
جايز يكون لغز كلنا بندور على اجابته
او جايز بنخاف نروح للحته دى عشان بتظهر الجزء الهش الحساس من شخصيتنا
بنتجنب التفكير فى الموضوع و احيانآ بندفن مشاعرنا و ساعات بننكر ان عندنا مشاعر اصلا
ريما خشيش - ما دام تحب بتنكر ليه...
كل واحد فينا عنده مفهومه الخاص عن الحب الى بيتغير مع مرور السنين و التجارب
و كلنا فى مرحله من حياتنا كان شغلنا الشاغل نبحث عن الحب
وبصراحه يا بخت الى لقاه
انا فاكره ان انا و صحابى فى فتره مراهقتنا كان عندنا فضول ناحيه الحب لدرجه اننا كنا بنسهركل حد و تلات نسمع اسامه منير عشان نعرف الناس الى بتحب دى بقه قصتهم ايه
: و لسه لحد دلوقتى حافظه مقدمه البرنامج بتاعه
" بكل الحب هنتكلم عن الحب و بكل الحب هنناقش قضايا الحب فى حلقه مفتوحه من القلب للقلب على راديو نجوم أف أم "
يمكن كان ادراكنا المحدود حاصر الحب فى ولد و بنت و نظرات و تلميحات و اغانى و احيانا غيره
لما كبرنا شويه مفهومنا عن الحب بقه اوسع شويه
بقينا عارفين ان احيانآ تصرفات أهلنا دى حب
و ان فى ناس حبهم غير مشروط حتى لو مكنوش عارفين يعبرو عنه بكلمه
الى خلف مننا عرف ان فى نوع تانى خالص من الحب تجاه ابنه أو بنته
حب الصحاب الى بينك و بينهم عشره عمر و عيش و ملح و ذكريات صعب تعوضها
حبك لأمك و أبوك و اخواتك رغم الخلافات الى ممكن تكون بينكو و رغم طبيعه العلاقه المعقده
حب البيت و الشوارع و الأماكن الى جايز تدركه و تحس بيه لما تتغرب او تبعد شويه
حب الأم لأولادها الى احيانآ كتير مش بيبقى مفهوم
حب الأخ الكبير لأخواته و احساسه بالمسؤليه ناحيتهم و انه سندهم بعد امهم و ابوهم
حب الشخص لشريك حياته و احساسه بالأمان و الراحه لمجرد انه حواليه حب العمل و حب الوطن رغم انه كلام يبدو كليشيه شويتين ...و الأهم فى كل دا و الى صعب جدآ الواحد يوصله
حب النفس
و الحقيقه ان حب النفس مش بس الواحد صعب يوصله لأ هو الواحد صعب يدركه و يفهم معناه
عشان زى ما قولنا الحب لغز
فى ناس عاشت حياتها كلها بتدور على الحب و مطالوش
و ناس كانت محظوظه كفايه انها متحاوطه بالحب من كل جانب , صحابهم , اهلهم , شريك حياتهم
و فى ناس لقت الحب فعلآ بس ضاع منها
و فى ناس الحب كسرها فقررت تلعنه فى كل مناسبه و تكفر بوجوده و تشكك فى صدق اى حد بيحب
و فى ناس متعرفش يعنى ايه حب اصلآ عمرهم ما عاشوه بجد
و ناس بطلت تدور على الحب و قررت تحب نفسها اكتر
و لكن خلينا نتفق ان الى لقي الحب الحقيقى هو بنى آدم محظوظ لأبعد حد
و جايز تعريفنا للحب الحقيقى يختلف ,, ممكن نشوف ان الحب الحقيقى هو حد قادر يعبرلك عن حبه بكلمات و افعال بأستمرار و بيأكدلك حبه كل دقيقه و كل ثانيه
و ممكن نشوف ان الحب الحقيقى هو ان الشخص يبقى سند و ضهر يبقى موجود لما تحتاجه و تقدر تعتمد عليه و يشيلك لما تقع
و ممكن يكون الحب الحقيقى هو شخص بيحطك أولويه دايمآ فى حياته عن أى حد تانى و احيانآ حتى عن نفسه
ممكن يكون حد قادر يسمعك كويس و يفهمك بأقل مجهود ,,حد قادر يتعاطف معاك و يحتويك
ممكن يكون حد مهتم بمصلحتك و انك دايما تبقى شخص احسن و بيزقك دايما انك تطور من نفسك
عمومآ مش مهم ابدآ الناس شايفه الحب الحقيقى ايه اد ما مهم انك تحس الحب دا مع شريك حياتك و تبقى مرتاح و مبسوط معاه
و لو انت لسه ملقتش حب حياتك خليك عارف اننا كتير اوى انت مش لوحدك
و مش شرط ابدآ يكون العيب فيك عشان دا فخ بنقع كلنا فيه ,, الحب ملوش كتالوج
ملوش خطوات لو عملتها هتوصل
الحب الحاجه الوحيده الى السعى فيها لا يضمن حتميه الوصول
و بما ان عيد الحب قرب فأحب اقتبس من فيلمى المفضل
the eternal sunshine of the spotless mind
Today is a holiday invented by greeting card companies to make people feel like crap.
وفى النهايه اتمنى من كل قلبى ان كل واحد يلاقى الحب الى يستاهله
و كما قالت أم كلثوم الحب كده :)
جميل اوي بجد 🥺💗💗💗
ردحذفمكنتش اتخيل الصراحه هتوصفي كده و تتكلمي بطريقه مشابه فعلا ل نظرتي برضو
شكرًا علي المقال الرائع ده