يا ليلة العيد

كل سنه وانتم طيبين و بصحه و سعاده و هنا و عافيه

كل سنه و انتم متونسين بحبايبكم و أهلكم و أصحابكم و متحاوطين بالحب و الدفى و الطمأنينه و البهجه و السعاده و الرضا

كل سنه وانتم دايما في حال احسن و فى مكان أحسن و مع ناس احسن

كل سنه و انتم طيبين :)

*يا ليلة العيد انستينا*

رمضان السنه دى عدى على معظمنا لطيف خفيف جميل

مليان ونس و لمه ،، يمكن عشان السنه دى بدأنا نشم نفسنا شويه بعد الكورونا و نطمن.

الى حبيته جدآ فى رمضان السنه دى ان اللمه فى البيوت مكنتش لمه الأهل بس ،، هى فيها لمه الصحاب كمان

و حقيقى بحس ان العلاقات عموماً بتاخد شكل اعمق و أحلى بكتير لما الصحاب بتدخل بيوت بعض و يتلمو على

سفره واحده.

مكنتش بفهم اوى المثل الى بيقول دا إحنا بينا عيش و ملح

كدليل على اصاله العلاقه و قوتها.

بس دلوقتي فهمته :) 

لما بتدخل بيت حد و تاكل من اكل اهل البيت او حتى تتجمعو على أكل عموماً بيبقى فى نوع من الألفه و العمق فى العلاقه بينكو بتتكون لوحدها.

رمضان السنه دى الحمد لله كان مليان عزوه و لمه و فرحه و ونس فى كل بيت

فى مشاعر حب صادقه و علاقات بتاخد منحنى اقوى بكتير و انت قادر تشوف الأثر دا بعينك فى جروبات كتير من الصحاب.

السنه الى فاتت كان الثيم العام لرمضان هو ال spaces بتاعه تويتر و تحليل المسلسلات و الرغى لحد الفجر.

السنه دى ال spaces اقل بكتير عشان معظم الى بقو صحاب منها خدو ال spaces لأرض الواقع و بقو يتقابلو و يقضو وقت حقيقى سوا و علاقتهم بقت قويه و اتحولو لجروب صحاب لمتهم تشرح القلب.

و من الى انا شايفاه ان فى كل بلد حرفيآ بقه فى لمه و عزومه على الفطار و ونس يمكن مكنش موجود اوى السنه الى فاتت.

السنه الى فاتت معظم الناس دى مكنتش تعرف بعض ،، السنه دى ملمومين حوالين سفره واحده :) 

الميزه فى تويتر يمكن رغم الاختلافات الجوهريه بين الشخصيات المختلفه و انه بيبين كل حاجه و نقيضها

بس هو مساحه حلوه جدآ انك تلاقى الناس الى شبهك و تقرب منهم و تبقو صحاب.

يمكن السنه دى اكتر سنه فطرت فيها بره مع صحابى

و أول سنه اعمل عزومه كامله لوحدى , *اينعم هى مكنتش عزومه اوى يعنى بس انا اعتبرتها عزومه :'D *

اول سنه يبقى بالصدفه ناس كتير نازله مصر اجازه و يتجمعو سوا

و اول سنه احس بالحب و السعاده و الطمأنينه محاوطانى من صحابى بالشكل دا :') 

مشاعر يمكن صعب جدآ اوصفها بكلام

ناس كتير علاقتى بيهم خدت منحنى عميق جدآ مكنتش اتخيله 

رغم المسافات الى بينا و الظروف المختلف بس كل واحد كان بيعمل الى يقدر عليه عشان يقرب للتانى خطوه

حتى كلامنا سوا و الطريقه الى شايفين بيها بعض و شايفين بيها أثر علاقتنا و الحاجات اللي بنحبها و الحاجات اللي مرينا بيها سوا ،، كلها ذات قيمه و مختلفه و مميزه .

يمكن رمضان خلانى أدرك قيمتهم فى حياتى اكتر و اكتر

و قيمه الصحاب و العيله و الونس

و قيمه السلام و السكينه و ان ميبقاش فى حاجة جديدة بتحصل و لا سباق ،، الناس كلها واخده بريك و بتستمتع بوقتها على اد ما تقدر .

و احلى حاجه بعد رمضان ان العيد بيجى بفرحته و اجواءه الدافيه و الكحك و البسكويت و البيتيفور و الفسيخ و الرنجه و اللمه .

عشان يبقى احلى ختام لشهر جميل لطيف خفيف على القلب

ربنا يجعل ايامنا كلها سعاده و هنا و ونس 

و يرزقنا دايما بالصحبه الصالحه و الصحاب السند و المحبه الصادقه و الناس السالكه قولو آمين :)

كل سنه وانتم طيبين ❣️