هتمرد على الوضع الحالى
النهارده صحيت من النوم قررت انى هبطل قلق
و دى بتجرى فى دمى من و انا طفله ، ومش عارفه ليه
طول الوقت قلقانه و متوتره و حاسه بعدم أمان
طول الوقت ب over plan كل خطوه و بحسبها مليون مره قبل ما اخد اى risk.
طول الوقت بفكر فى كل الاحتمالات الممكنة الى ممكن تخلى فى احتمال و لو ضعيف ان الدنيا متمشيش زى ما انا عايزه.
بقلق من رأى الناس و نظرتهم ليا رغم انى ببان عكس كده تماماً ومش فارق معايا حد.
بخاف حد يحكم عليا غلط او يفهمنى غلط او يحطنى فى زون مش بتاعتى عشان شاف تصرف ما منى.
بخاف حد يسألنى عن حاجات عاديه جدآ زى خارجه فين و مع مين.
بخاف أبان او اتحط تحت ال spot light رغم انى بعرف اعمل دا بسهوله.
بخاف من حكم ناس راندوم ملهومش اى وزن او اهميه فى حياتى لدرجه اني بفضل شايله هم الافكار الى ممكن تيجى فى دماغ الناس الى فى شارعنا لو رجعت متأخر يوم لوحدى.
جايز عشان اتربيت على كده ،، جايز واخده القلق وراثه و فكره انى ابقى شايله هم الكوكب على دماغى.
بس لسبب ما انا مش قادره الاقيله تفسير اوى
صحيت من النوم قررت انى هبطل اقلق !
و مش هخاف ابين جوانب حياتى ال interesting عشان خايفه من الاحكام العشوائية من ناس مش مهمه عندى.
مش هخاف ابقى تحت ال spot و مش هخاف اخد validation كتير عادى.
هبطل اقلق بشكل مبالغ فيه على الناس القريبه منى و ابقى مؤمنه من جوايا ان قلقى مش هيفيد بحاجة.
هبطل اتوتر من اقل حاجه و هبطل افكر و احسبها كتير قبل ما اعمل حاجه انا بحبها.
فى العادى كنت بطلب اوبر بعيد عن مدخل العماره عشان الخضرى الى فاتح فى وش العماره و مركز مع الرايحه و الجايه ميشوفنيش و يقول حاجه عليا!
النهارده صحيت و حسيت انها فكره ساذجه سخيفه و ان قلقى الزياده دا مسوحنى بشكل كبير و يعنى ما يقول الى يقوله!
و طلبت اوبر قدام البيت عادى جدآ
كنت بخاف اتصور فى مكان شغاله فيه شكله حلو او ابين انى عايشه حياتى بزياده عشان التعليقات الرخمه من الناس القديمه فى حياتى و مستغربين الايف ستايل الجديد بتاعى
و بيعلقو تعليقات سخيفه و بيسألو اسئله سخيفه
صحيت الصبح و قررت انه اى حد هيقول حاجه هكسفه و انى مش هشيل هم تعليق رخم او انطباع ممكن يكون غلط
الى واخد عنى فكره غلط يبروزها.
انا صحيت الصبح النهارده و قررت هركز على نفسى و على مشاكلى و على الحاجات اللي هتخلينى احسن و اعيش حياه احسن و هعمل الى يبسطنى و يرضينى مش يرضى الناس
صحيت الصبح و قررت انى هتمرد على الوضع الحالى 😄
تعليقات
إرسال تعليق